Bjarni Ákason, framkvæmdastjóri og einn eigenda Bako Ísberg, varð fyrir fólskulegri árás fyrir utan heimili sitt seinnipartinn í gær. Um er að ræða fjölskylduharmleik en að sögn Bjarna var það stjúpsonur hans sem réðst á hann í félagi við annan mann sem hefur reglulega ratað í fjölmiðla fyrir ofbeldsverk.

„Ég byrja að fá símtöl upp úr hádegi frá syni konunnar minnar sem er dópisti. Hann byrjar að hóta mér en ég skelli bara á hann. Svo fer hann að senda mér skilaboð og fer að hringja í mömmu sína og segir að vondi kallinn ætli að koma að tala við mig. Svo mættu þeir tveir og gengu í skrokk á mér,“ segir Bjarni í samtali við blaðamann en börn urðu vitni að árásinni.

Stjúpsonurinn hefur glímt við fíkniefnadjöfulinn en náði síðan í fimm ár að halda sér edrú. Fyrir ári síðan féll hann og hafði Bjarni lítið sem ekkert rætt við hann síðan. Það breyttist að sögn Bjarna þegar stjúpsonurinn fór að biðja hann um pening í gær.

„Hann er dópisti og hver dagur hjá þessum gæjum kostar 150 þúsund krónur,“ segir Bjarni en hyggst kæra bæði stjúpsoninn og hinn meinta ofbeldismanninn og fara í skaðabótamál.

Bjarni er lemstraður í dag og er með glóðarauga eins og sjá má á myndinni sem fylgir fréttinni. Þá sagðist hann eiga erfitt með að hreyfa á sér hendina eftir að hafa fallið í jörðina.