Eins og líklega allir Íslendingar vita þá voru allar sóttvarnatakmarkanir felldar niður í gær. Margir höfðu eflaust áhyggjur af því að djammið myndi gera það að verkum að það yrði brjálað að gera hjá lögreglunni en ef miðað er við dagbók lögreglunnar þá var það ekki staðan.
Aðeins eitt atvik tengist djamminu í miðbænum og átti það sér meira að segja stað fyrir miðnætti. Um kl 23 í gær óskuðu dyraverðir á skemmtistað í miðbænum eftir aðstoð vegna einstaklings sem var til vandræða. Einstaklingurinn var fjarlægður af staðnum og hélt sína leið eftir viðræður við lögreglu.
Þá voru alls 10 ökumenn stoppaðir af lögreglu vegna gruns um akstur undir áhrifum áfengis eða annarra vímuefna. Flestir ökumennirnir voru stöðvaðir í Mosfellsbæ eða fjórir talsins. Einn ökumaður var síðan stöðvaður fyrir að aka of hratt en sá ók á 114 km/klst hraða á svæði þar sem hámarkshraðinn er 80 km/klst.
