Umfjöllun um nýja #metoo-bylgju hefur ekki farið fram hjá mörgum landsmönnum en ríflega 81% landsmanna hafa tekið mikið eftir henni undanfarið, 11% hafa hvorki tekið mikið né lítið eftir henni, um 4% frekar lítið en rúmlega 3% mjög lítið eða ekkert. Þetta kemur fram í nýjum Þjóðarpúlsi Gallup.
Konur hafa tekið meira eftir umfjölluninni en karlar og fólk með meiri menntun hefur tekið meira eftir umfjölluninni en fólk með minni menntun. 89% kvenna hafa tekið mikið eða mjög mikið eftir umfjölluninni samanborið við 74% karla.
Flestir telja jákvætt að umfjöllunin fari fram, eða ríflega 84%, einn af hverjum tíu telur það hvorki jákvætt né neikvætt en ríflega 5% telja það neikvætt.
Konur telja frekar jákvætt að umfjöllunin fari fram en karlar og fólki finnst það jákvæðara eftir því sem það er yngra. Íbúum höfuðborgarsvæðisins finnst það einnig jákvæðara en íbúum landsbyggðarinnar, og fólki með meiri menntun jákvæðara en fólki með minni menntun. Loks eru þeir sem hafa tekið mikið eftir umfjölluninni líklegri til að telja jákvætt að hún fari fram en þeir sem hafa tekið lítið eftir henni.
Umfjöllunin virðist hafa komið af stað víðtækri samræðu í samfélaginu því ríflega sex af hverjum tíu segjast hafa rætt við einhvern um kynferðislega áreitni eða kynferðisofbeldi í kjölfar umfjöllunarinnar. Flestir hafa rætt málefnið bæði við manneskju af sama og öðru kyni en það sjálft, eða 42%, ríflega 11% hafa aðeins rætt það við manneskju af öðru kyni en það sjálft og nær 9% hafa aðeins rætt það við manneskju af sama kyni.
Konur hafa frekar rætt málefnið við einhvern í kjölfar umfjöllunarinnar en karlar, en 68% kvenna hafa gert það á móti tæplega 57% karla. Konur eru einnig líklegri en karlar til að hafa bæði rætt málefnið við manneskju af sama og öðru kyni en þær sjálfar. Karlar eru líklegri til að hafa rætt málefnið við manneskju af öðru kyni en við annan karlmann, á meðan konur eru líklegri til að hafa rætt það við aðra konu en manneskju af öðru kyni.
Fólk er að jafnaði líklegra til að hafa rætt málefnið við einhvern í kjölfar umfjöllunarinnar eftir því sem það er yngra. Þannig hefur 81% fólks undir þrítugu gert það á móti 48% fólks yfir sextugu. Þeir sem hafa meiri menntun eru einnig líklegri til að hafa gert það en þeir sem hafa minni menntun að baki. Nær 69% þeirra sem hafa tekið mikið eftir umfjölluninni hafa rætt málefnið en tæplega 23% þeirra sem hafa tekið lítið eftir henni. Ríflega 65% þeirra sem telja jákvætt að umfjöllunin fari fram hafa rætt málefnið en um 39% þeirra sem telja það neikvætt.
Niðurstöður sem hér birtast eru úr netkönnun Gallup sem gerð var dagana 14.-27. maí 2021.
Þátttökuhlutfall var 45,3%, úrtaksstærð 1.796 einstaklingar 18 ára eða eldri af öllu landinu valdir af handahófi úr Viðhorfahópi Gallup.
