Sky Lagoon, nýr lúxus baðstaður á Kársnesi í Kópavogi, ætti ekki að hafa farið fram hjá neinum en hann opnaði með þó nokkrum látum í lok apríl. Þúsundir hafa síðan heimsótt baðstaðinn, flestir vopnaðir myndavélum enda þykir staðurinn Instagram-vænn með eindæmum.

Samkvæmt heimildum DV var Covid-19 smitaður einstaklingur meðal gesta síðastliðinn sunnudag og hafa gestir sem heimsóttu staðinn þann dag verið skikkaðir í sýnatöku. Þó virðist enginn hafa verið sendur í sóttkví vegna málsins, að svo stöddu.

Í samtali við DV segir Dagný Pétursdóttir, framkvæmdastjóri Sky Lagoon, að smitrakningateymið hafi haft samband við sig. „Við fengum símtal frá smitrakningateyminu sem staðfesti að gestur sem var hjá okkur á sunnudag hefði greinst jákvæður af Covid,“ útskýrir Dagný.

„Við erum búin að hafa samband við þá sem voru hér hjá okkur þá,“ segir Dagný. „Eina sem smitrakningateymið bað okkur um að gera var að biðja gesti sem voru hjá okkur að fara varlega.“

Í samtali við blaðamann sagði ónafngreindur gestur sem stakk sér til sunds á sunnudag í Sky Lagoon að hann hefði einnig verið beðinn um að fara í skimun, en hann hefði litlar áhyggjur af stöðunni.