Fjögur innanlandssmit af Covid-19 greindust í gær og voru allir í sóttkví. Tekin voru hátt í 800 sýni.

Fækkað hefur í einangrun og sóttkví undanfarna daga. Nýgengi sjúkdómsins hér á landi er nú tæplega 40 á hverja 100 þúsund íbúa.

Athygli vekur að engin smit greindust á landamærum í gær en töluverður fjöldi ferðamanna kom til landsins.

Hjördís Guðmundsdóttir, samskiptastjóri Almannavarna, segir að tölu undanfarinna að daga séu ánægjulegar. „Við erum samt alltaf viðbúin því að það geti gosið upp nýjar hópsýkingar,“ segir hún.

Þórólfur Guðnason sóttvarnalæknir hefur skilað heilbrigðisráðherra minnisblaði með tillögum að nýjum sóttvarnaaðgerðum en núverandi reglugerð rennur út á miðvikudag. Ekki er vitað hvort Þórólfur leggur til tilslakanir í minnisblaði sínu.