Á níunda tímanum í gærkvöldi var tilkynnt um líkamsárás á veitingahúsi í miðborginni. Þar hafði maður í annarlegu ástandi veist að starfsmanni. Árásarmanninum hafði ítrekað verið vísað út vegna brota á sóttvarnalögum. Þetta fór greinilega illa í hann því hann veittist að starfsmanninum með höggum og spörkum.

Manninum var haldið í tökum þegar lögreglan kom á vettvang og var hann handtekinn. Hann hótaði lögreglumönnum lífláti og sparkaði í einn þeirra. Hann var vistaður í fangageymslu. Við leit á honum fundust ætluð fíkniefni.

Á sjötta tímanum í gær var maður handtekinn í Vesturbænum en hann er grunaður um líkamsárás og þjófnað. Hann var í annarlegu ástandi og var vistaður í fangageymslu. Um klukkan 20 var tilkynnt um innbrot og þjófnað í miðborginni, tölvu var stolið.

Á tíunda tímanum lenti leigubifreiðastjóri í vandræðum með farþega sem gat ekki greitt fyrir aksturinn á Seltjarnarnesi. Farþeginn var með varning meðferðis sem er talinn vera þýfi. Lögreglan lagði hald á varninginn. Ætluð fíkniefni fundust á farþeganum.

Um klukkan 19 var ekið á bifreið í Breiðholti og að því búnu lét tjónvaldur sig hverfa á brott. Hann var handtekinn skömmu síðar en hann er grunaður um að hafa verið undir áhrifum áfengis og fíkniefna og akstur sviptur ökuréttindum. Hann var vistaður í fangageymslu.

Skömmu eftir miðnætti var maður, í annarlegu ástandi, handtekinn í Breiðholti en hann er grunaður um innbrot og þjófnað. Hann var vistaður í fangageymslu.