Menn bæði innan og utan undirheima hafa lýst yfir efasemdum um þær fullyrðingar lögreglu að Armando Bequirai, sem skotinn var til bana fyrir utan heimili sitt í Rauðagerði þann 13. febrúar, hafi tengst undirheimum.

Ónafngreindar og óstaðfestar heimildir eru jafnan nokkuð vandmeðfarinn efniviður fyrir blaðamenn. En stundum er ekki hægt að leiðar slíkar raddir hjá sér. Allar götur frá því rannsókn á Rauðagerðismorðinu hófst hafa aðilar sem þekkja (mismikið) til Armandos eða sakborninga í málinu verið í sambandi við fjölmiðla. Er þar bæði um að ræða menn úr undirheimum, menn með tengsl við undirheima og einhverja sem falla í hvorugan hópinn, en þekkja þó til málsaðila. Tiltölulega lítið af þess um upplýsingum hefur ratað í fréttir, eðli þeirra samkvæmt.

Lögregla fullyrti á upplýsingafundi um Rauðagerðismálið í gær að Armando hefði tengst undirheimum. Aðilar sem þekktu til hans, bæði innan og utan undirheima, segja að svo hafi ekki verið.

Margir segja hann einfaldlega hafi verið duglegan og friðsaman mann. Vitað er að í starfi sínu við dyravörslu naut hann vinsælda meðal veitingamanna.

„Armando var góður gaur. Ég fíla ekki hvernig er talað um hann,“ segir ónefndur maður við DV, sem stendur utan undirheima.

Aðrir eigendur öryggis- og dyravörslufyrirtækisins sem Armando starfaði hjá og rak fullyrða einnig að hvorki hann né fyrirtækið hafi tengsl við glæpi.

Með því að greina frá þessu hér er engan veginn verið að draga upplýsingar lögreglunnar í gær í efa. En upplýsingarnar ná skammt og eru óljósar. Menn sem DV hefur rætt við vegna málsins spyrja: Hvað felst í því að tengjast undirheimum? Þær upplýsingar liggja ekki fyrir hvaða tengsl lögreglu telur að Armando hafi haft við undirheima.