Maríanna Csillag hefur sinnt hjálparstörfum víða um heim. Í hinni einstaklega grimmdarlegu og blóðugu borgararstyrjöld í Rúanda árið 1994, þegar um 800 manns af Tútsí-þjóðflokknum voru brytjuð niður í grimmdaræði sem knúið var áfram að kynþáttahatri og stanslausum áróðri, hjálpaði Maríanna miklum fjölda fólks að flýja.

Maríanna segir þessa sögu í þættinum „Okkar á milli“ á RÚV í kvöld.

Maríanna var staðsett í nágrannaríkinu Tansaníu þar sem hún hjálpaði Tútsum sem flúðu þangað frá Rúanda og leituðu skjóls fyrir grimmdaræðinu í flóttamannabúðum. Í kynningu á þættinum er drepið á hryllilega frásögn Maríönnu:

„Einn daginn þegar Maríanna kom keyrandi að búðunum sá hún fimm þúsund manna hóp sem nýlega hafði komið yfir landamærin, var orðinn örmagna og hafði ekki orku til að halda lengra. Hún gekk meðfram ánni til að kanna hvort fleiri væru að reyna að komast yfir og heyrði þá mikil læti og sá fólk öskra og hlaupa í átt að ánni.

Sumir svömluðu upp í báta til að sigla yfir, aðrir reyndu að stinga sér til sunds. Margir þeirra sem reyndu að leggjast til sunds urðu krókódílum að bráð en þeirra sem voru handsamaðir áður en þeir komust að ánni biðu grimmileg örlög. „Þeir voru hoggnir í spað með sveðjunni,“ segir Maríanna. „Ég verð að viðurkenna að ég sneri mér undan og skilaði innihaldi magans, kastaði bara upp. Mér fannst þetta alger hryllingur.“

En það var lítill tími til að kveinka sér og Maríanna tók sig saman í andlitinu og hóf að aðstoða helsært fólk sem komst yfir. „Þessi neyð. Þú ert að reyna að bjarga þér. Þú tekur sénsinn,“ segir Maríanna. „Þessi grimmd sem var þarna, þetta var ólýsanlegt.““