Hann er skrautlegur listinn af þýfi sem maður er sakaður um að hafa stungið inn á sig er hann braust inn í hús í Reykjanesbæ þann 15. nóvember árið 2019. Dæmt var í málinu í Héraðsdómi Reykjavíkur í morgun.

Maðurinn spennti upp svefnherbergislugga í húsi í Reykjanesbæ með skóflu. Síðan tekur við í texta dómsins upptalning á því sem hann stal úr húsinu, sá listi er langur:

„…Apple fartölvu, 59.000 kr. í reiðufé, nuddbyssu og fylgihlutum, límtúbu, sautján hálsmenum, sex silfureyrnalokkum, fjórum gulleyrnalokkum, tveimur hvítum eyrnalokkum, fjórum svörtum eyrnalokkum, tveimur bláum steinaeyrnalokkum, fjórum steinmagalokkum, fjórum gullhringum með steini, fimm brjóstnælum, handtösku og þremur snyrtitöskum.“

Maðurinn var auk þess ákærður fyrir tvö umferðarlagabrot.

Hann játaði brot sín og var dæmdur í sjö mánaða fangelsi. Hann þarf auk þess að greiða 760 þúsund krónur málskostnað.