Páll G. Guðmundsson er látinn, á áttugasta aldursári. Hann kvaddi mánudaginn 15. mars á heimili sínu eftir erfið veikindi. Knattspyrnufélag Reykjavíkur – KR – lék svo stórt hlutverk í lífi Páls að í tilkynningu um andlát hans í Morgunblaðinu er hann titlaður vélfræðingur og KR-ingur.
Páll starfaði sem vélfræðingur hjá vélsmiðjunni Héðni, Vélsmiðju Einars Guðbrandssonar, Haferninum og víðar. Meðfram atvinnu sinni varði hann ómældum tíma í félagsstarf hjá KR. Hann vann meðal annars ötullega að dómaramálum, uppbyggingu yngri flokka í handbolta og uppbyggingu meistaraflokks kvenna í knattspyrnu.
„KR var númer eitt tvö og þrjú,“ segir Ásta Jónsdóttir, eftirlifandi eiginkona Páls. „Það sem kom honum alltaf í gott skap var að fjölskyldan væri hér öll saman komin og þegar KR vann. Það sem kom honum síðan alltaf í vont skap var þegar KR tapaði.“
Veikindi Páls voru langvinn en hann kvaddi þennan heim í faðmi fjölskyldunnar. „Hann var lengi veikur, versnaði á haustmánuðum og lagðist inn á sjúkrahús 29. janúar, í líknandi meðferð. Hann kom síðan heim og varði síðustu þremur vikunum á heimilinu. Það var hans ósk að fá að deyja hérna heima, að vera í sínu umhverfi. Hérna sat hann í stólnum sínum og horfði á íþróttir. Kvöldið áður en hann dó þurfti hann að vita hvernig United-leikurinn fór,“ segir Ásta en auk þess að styðja KR í blíðu og stríðu var Páll mikill stuðningsmaður enska liðsins Manchester United.
Húmorinn er það fyrsta sem kemur upp í huga Ástu þegar hún er beðin um að lýsa Páli. „Hann Palli var svo mikill húmoristi og hann hélt í húmorinn fram á síðustu stundu. Við fengum mörg skondin tilsvör frá honum alveg fram á næstsíðasta klukkutímann. Hann var alltaf svo lífsglaður og hann var skýr í hugsun alveg fram á síðustu stundu.“
Útför Páls verður frá Seljakirkju þann 26. mars næstkomandi. Ásta upplýsir að útförin verði í reynd KR-messa. „Þetta á ekki að vera útför heldur KR-messa,“ segir Ásta en þetta verður gert samkvæmt ósk Páls og má fullyrða að ekkert geti heiðrað minningu hins miklu KR-ings betur en að hann verði kvaddur hinstu kveðju með félagið hans í forgrunni.
