Sextíu og fjögurra ára gamall maður hefur verið ákærður fyrir stórhættulegan akstur í miðbæ Reykjanesbæjar. Atvikið átti sér stað þann 15. maí árið 2020. Maðurinn ók meðal annars upp á gangstétt og rétt framhjá barni á hlaupahjóli. Hefði háttalag mannsins getað haft hræðilegar afleiðingar.

Maðurinn er sagður hafa ekið bíl sínum rásandi, án nægilegrar tillitssemi og varúðar um Heiðarbraut í Reykjanesbæ, þaðan sem hann beygði viðstöðulaust út á Vesturgötu, í veg fyrir bíl sem ekið var um Vesturgötu þannig að lá við árekstri. Hann hafi síðan ekið út af akbrautinni og upp á gangstétt þar sem minnstu munaði að hann æki á vegfarendur. Síðan segir í ákærunni:

„Ákærði ók þaðan áfram vestur Vesturgötu, beygði suður Hólmgarð, þaðan sem hann beygði vestur Nónvörðu, suður Fagragarð þar sem kærði ók bifreiðinni uppá gangstétt, vestan akbrautar, rétt framhjá barni sem var þar á hlaupahjóli, sveigði bifreiðinni því næst aftur inná akbrautina, ók áfram suður Fagragarð, beygði viðstöðulaust vestur Aðalgötu, í veg fyrir umferð sem ekið var um Aðalgötu þannig að lá við árekstri, ók bifreiðinni áfram vestur Aðalgötu og út af akbraut skammt frá gatnamótum Aðalgötu og Vatnsholts þar sem hann sveigði bifreiðinni þvert yfir akbrautina í kjölfarið. Ákærði ók þar næst á grindverk og ljósastaur til móts við Vatnsholt lD, þar sem hann stöðvaði aksturinn. Með háttsemi sinni raskaði kærði umferðaröryggi á alfaraleið og stofnaði lífi og heilsu annarra vegfarenda í augljósan háska með ófyrirleitnum hætti.“

Maðurinn telst með háttsemi sinni hafa brotið bæði hegningarlög og umferðarlög. Er þess krafist að hann verði dæmdur til refsingar og greiðslu alls sakarkostnaðar.

Málið verður þingfest 23. mars í Héraðsdómi Reykjaness.