„Talan er núll í dag,“ segir Hjördís Guðmundsdóttir, samskiptastjóri Almannavarna, í spjalli við DV. „Þetta er uppáhaldstalan mín, hún er ofsalega falleg þessi tala,“ bætir hún við í léttum tóni. Enginn greindist innanlands í gær en 608 sýni voru tekin. „Það greindust fjórir á landamærum sem er ekki eins gott,“ bætir Hjördís við en hún leyfir sér að vera bjartsýn. Hún útilokar þó ekki fjórðu bylgjuna.
„Við þorum það ekki alveg því það er ennþá fólk í sóttkví og ennþá fólk í einangrun, á meðan svo er þorum við ekki að hrósa happi,“ segir hún en alls eru 24 í sóttkví og 30 í einangrun. Mikil fækkun hefur þó orðið í þessum hópum undanfarið en margir lentu í sóttkví í kjölfar smita sem fundust eftir að starfsmaður á Landspítalanum greindist smitaður fyrr í mánuðinum. Hafði hann smitast af nágranna sínum sem bar breska afbrigði veirunnar inn í landið.
„Fólk er greinilega ekki til í fjórðu bylgjuna,“ segir Hjördís og þakkar almenningi fyrir árvekni undanfarið. Fólk sé greinilega að passa upp á sóttvarnir og það skili sér í skimun ef það finnur til einhverra einkenna.
