Á öðrum tímanum í nótt var maður, sem var í annarlegu ástandi, handtekinn í vesturhluta borgarinnar fyrir að valda truflun og raska svefnfriði íbúa. Að auki fór hann ekki eftir fyrirmælum lögreglunnar. Hann var vistaður í fangageymslu.

Í Garðabæ var einn handtekinn, grunaður um líkamsárás, á ellefta tímanum í gærkvöldi. Sá var vistaður í fangageymslu.

Tveir ökumenn voru handteknir í gærkvöldi og nótt grunaðir um að vera undir áhrifum fíkniefna.

Á þriðja tímanum í nótt var maður handtekinn í Árbæ en hann er grunaður um líkamsárás.

Lögreglunni var tilkynnt um fjögur mál varðandi þjófnað/hnupl úr verslunum í gærkvöldi og nótt. Málin voru afgreidd á vettvangi. Eitt þeirra með aðkomu foreldra og barnaverndaryfirvalda því gerandinn reyndist vera á barnsaldri.

Einn var handtekinn í miðborginni síðdegis í gær en sá var í annarlegu ástandi. Á honum fundust meint fíkniefni. Maðurinn var vistaður í fangageymslu.