Kona og karl á fertugsaldri hófu samband árið 2014 og slitu því í upphafi árs 2016. Þau tóku síðan saman aftur um mitt ár 2016 og í desember það ár keyptu þau saman íbúð í götunni Hjallabraut í Hafnarfirði. Um mitt sumar 2018 slitu þau sambandinu og konan flutti út úr íbúðinni en maðurinn bjó í henni áfram. Íbúðin var seld í lok nóvember 2018. Parið greindi á um hve mikið hvoru bar af söluverðinu.
Um þetta snýst dómsmál sem rekið hefur verið fyrir Héraðsdómi Reykjaness en dómur var kveðinn upp í málinu í morgun. Maðurinn stefndi konunni til greiðslu um 15,7 milljóna króna en varakrafa hans hljóðaði upp á 6,9 milljónir.
Þó að meginlínur málsins séu einfaldar þá er það nokkuð flókið undir niðri og fléttast inn í það kyrrsetningarmál sem maðurinn höfðaði fyrr, á hlut konunnar í söluverði íbúðarinnar. Það hefur einnig áhrif á málið að parið var hvorki gift né í skráðri sambúð. Hins vegar liggur fyrir að þau voru bæði skráð eigendur að íbúðinni og hvort með 50% eignarhlut.
Íbúðin var seld fyrir 51 milljón króna. Þegar frá voru dregin áhvílandi lán og sölukostnaður kom til greiðslu rúmlega 17 og hálf milljón króna. Helmingur af fjárhæðinni rann til mannsins en hann fékk hlut konunnar kyrrsettan með úrskurði sýslumanns.
Manninum reiknast til að vegna mismikils framlag hans og konunnar til greiðslu afborgana af lánum á íbúðinni og að hann hafi lagt miklu meira til viðhalds hennar, meðal annars hafi verið skipt um parket á hans kostnað, þá sé hann í raun eigandi að tæplega 90% eignarhlut af íbúðinni, en ekki 50% eins og skráð var. Konan sagði hins vegar meðal annars í sínum málflutningi að í útreikningum mannsins væri ekki tekið tillit til þess sem hún hafi lagt af mörkum til kostnaðar við heimilishaldið í sambúð þeirra.
Það var í stuttu máli niðurstaða héraðsdóms að hafna aðalkröfu mannsins en samþykkja að miklu leyti varakröfu hans. Var konunni gert að greiða honum rétt rúmlega 5 og hálfa milljón króna. Kyrrsetningargerðin á eignarhlut konunnar sem hafði verið framkvæmd var staðfest að hluta, þ.e. af þessari upphæð, fimm og hálf milljón, rétt rúmlega.
