Af nægu var að taka hjá lögreglunni á höfuðborgarsvæðinu í gærkvöldi og nótt. Lögregla handtók ölvaðan mann vegna gruns um að hafa ollið umferðarslysi og stungið af snemma á níunda tímanum í gærkvöldi. Engin slys urðu á fólki en maðurinn vann sér inn nótt í fangageymslu vegna málsins. Má búast við að maðurinn verði yfirheyrður í morgun þegar runnið er af honum.

Hann var ekki einn um slíkt, en klukkan níu í gær handtók lögreglan mann í miðbænum vegna ofurölvunar og þótti ekki annað hægt en að vista hann í fangageymslu vegna annarslegs ástands síns.

Um hálf eitt barst lögreglu tilkynningu um hávaða úr samkvæmi í Austurborg Reykjavíkur. Segir í tilkynningu lögreglu að „múgæsingur“ hafi verið í fólki og voru fyrirmæli lögreglu virt að vettugi. Einn partýgesturinn gekk þó skrefinu lengra og ýtti við lögreglumönnum áður en hann sparkaði svo í lögreglubíl og hljóð í burtu. Lögregla náði manninum á hlaupum og handtók hann. Reyndist maðurinn með fíkniefni í vasanum þegar hann var handtekinn vegna sparksins. Maðurinn eyddi nóttinni í fangaklefa.

Þá segir í tilkynningunni að farið var inn á skemmti- og veitingastaði í Hafnarfirði í eftirlit með sóttvörnum og reyndust allir staðirnir sem heimsóttir voru með allt sitt á hreinu.

Talsvert var um ölvunar- og fíkniefnaakstur segir jafnframt í tilkynningunni.

Snemma í morgun, eða um hálf fjögur var svo ráðist á mann með glerflösku en afmælisveisla hafði þá farið úr böndunum og húsið fullt af óboðnum gestum. Ekki var talin þörf á sjúkrabifreið þó blæddi úr enni brotaþola og var gerandinn farinn af vettvangi þegar lögregla mætti þar.