„Þetta er náttúrulega eldvirkt svæði en við sjáum engan gosóróa eins og er,“ segir Sigríður Magna Óskarsdóttir náttúruvársérfræðingur.

„Þessi virkni er að vissu leyti óvenjuleg að því leytinu að það eru margir stórir skjálftar. Sjálfvirka kerfið okkar hefur mælt að minnsta kosti 11 skjálfta yfir 4 (á Richterskarðanum) en þær mælingar eru óyfirfarnar. Stærsti skjálftinn sem var rúmlega 10 í morgun mældist 5,7,“ segir Sigríður Magna.

Hafi þið áhyggjur? „Ekki eins og er. Við teljum að þetta sé hluti af þeirri hrinu sem hefur í gangi síðan í janúar í fyrra.“

Sigríður Magna ítrekar að fólk haldi ró sinni og leitist við að krjúpa, skýla höfði og halda sér. „Helst að vera úti ef fólk getur en alls ekki að hlaupa út ef það er inni. Halda kyrru fyrir og reyna að koma sér í skjól undir borð og krjúpa, skýla, halda.“

Sigríður Magna segir óvíst um næstu skjálfta en þeir gætu haldið áfram inn í næstu viku. „Við getum átt von á eftiskjálftum út daginn og næstu daga.“ Hún segir ómögulegt að segja til um hvort sá stærsti í þessari hrinu sé kominn.

„Það er ágætt að vara fólk líka við grjóthruni á Reykjanesi og vera ekki að fara í brattahlíðar eða í fjallgöngur á svæðinu.“ Hún vísar í stóran skjálfta 5,6 á svipuðu svæði í október í fyrra en því fylgdi töluvert grjóthrun.