Kristni Karli Brynjarssyni brá í brún er hann fékk tölvupóst frá Krabbameinsfélaginu, í gegnum rannsóknarteymið Áttavitann, þar sem hann var beðinn um að taka þátt í rannsókn sem lýtur að því að skrá reynslu krabbameinssjúklinga. Kristinn Karl hefur, sér vitanlega, aldrei greinst með krabbamein.

Í tölvupóstinum segir:

„Krabbameinsfélagið stendur fyrir umsvifamikilli rannsókn sem ber heitið Áttavitinn og er um reynslu fólks sem greinst hefur með krabbamein. Við vonum að þú sjáir þér fært að taka þátt. Niðurstöður rannsóknarinnar verða nýttar til að vinna markvisst að úrbótum og auknum stuðningi þar sem hans er þörf. Þín svör skipta máli.“

Kristinn svaraði um hæl:

„Ég átta mig ekki á því afhverju mér er sendur þessi póstur.  Ég hef aldrei svo ég viti greinst með krabbamein. Ætli ég myndi þó ekki vita af því ef svo væri? Kannski spurning um að nota „áttavitann“ rétt svo þið rambið kannski á fólk sem greint hefur verið með krabbamein.“

Kristinn fékk þau svör að tölvupóstur af þessu tagi væri eingöngu sendur að undangengnu símtali þar sem gefið er samþykki sendingunni:

„Sæll Kristinn. Tölvupóstur eins og þú fékkst sendan er aðeins sendur eftir að símtal hefur átt sér stað þar sem gefið er samþykki fyrir að hann sé sendur. Það lítur því út fyrir að netfangið hafi verið skráð rangt og biðjumst við afsökunar á þessum mistökum.“

Í samtali við DV segir Kristinn að hann geti vel lifað með því að hafa fengið þessa sérkennilegu sendingu, en: „ En væri samt til í að vita hvort einhver hafi gefið leyfi í mínu nafni og þá hvort leyfið hafi verið dobbúltjékkað. Eða í hvern hringdi Krabbameinsfélagið og fékk þetta póstfang?“

DV hafði samband við Jóhönnu Torfadóttur, ábyrgðarmann Áttavitans og aðjúnkt við Háskóla Íslands. „Við náðum að fara yfir þetta en ef þessi maður var að fá tölvupóst þá hefur líklega verið slegið inn rangt netfang því það er verið að hringja í fólk og það gefur upp netfang og veita leyfi til að fá sendar upplýsingar um rannsóknina. Mér finnst mjög líklegt að sá sem tók niður netfang hafi misritað og þetta hafi farið á rangan mann.“

Kristinn er þó ávarpaður með nafni í tölvupóstinum. Jóhanna bendir á að um nafna gæti verið að ræða. Þess má geta að samkvæmt þjóðskrá á Kristinn Karl Brynjarsson sér engan alnafna. Í tölvupóstinum er hann ávarpaður „Kristinn“.

Jóhanna segir að 2-3 dæmi séu um mistök af þessu tagi við útsendingu tölvupósta til þátttakenda í rannsókninni. Haft er samband við um 2.000 manns vegna rannsóknarinnar.