Eitt innanlandssmit greindist í gær og var sá í sóttkví við greiningu. Þrír greindust á landamærunum af 409 sýnum sem tekin voru.

Þetta kom fram á upplýsingafundi almannavarna þar sem Víðir Reynisson frá almannavarnadeild ríkislögreglustjóra, Þórólfur Guðnason sóttvarnalæknir, og Jón Pétur Jónsson, sviðsstjóri landamærasviðs ríkislögreglustjóra.

Þórólfur tjáði sig um flökkusögur um samning Íslands við Pfizer um allsherjar rannsókn á hjarðónæmi. Sagði Þórólfur að samningsdrög við Pfizer hafi enn ekki borist Íslendingum. „Á meðan svo er þá liggur ekki fyrir hvort af þessu verður, og því síður um hvað marga skammta verði um að ræða,“ sagði Þórólfur.

Aðspurður hvort skilyrði yrði að landamæri Íslands yrðu opnuð sem hluti af rannsókninni sagði Þórólfur að hann hefði heyrt margar útgáfur af þessum flökkusögum. „Sumar skemmtilegar, aðrar ekki,“ sagði hann. Hann sagðist hins vegar ekki getað tjáð sig nánar um innihald þeirra fyrr en samningsdrög liggja fyrir.

Þórólfur sagðist geta fullvissað almenning um það að upplýsingar um samninginn við Pfizer verði opinberaðar þegar eitthvað verði að frétta af samningnum.

Þá kom fram að 15 hafi greinst jákvæðir síðustu vikuna á landamærum, ýmist í fyrstu eða annarri sýnatöku. Þar af voru um helmingur með virk smit.

62 hafa greinst með hið svokallaða breska afbrigði veirunnar hér á landi. Þar af greindust 14 innanlands og voru þeir í nánum tengslum við þá sem greinast á landamærunum. Þórólfur sagði að ekki væri að sjá frekari útbreiðslu á þessu afbrigði.

Enginn hefur greinst með suður afríska eða brasilíska afbrigðið hér á landi. „Heilt yfir er staðan bara nokkuð góð,“ sagði Þórólfur.