Þrír íslenskir karlmenn, einn miðaldra og tveir ungir, eru sakaðir um hrottalegt ofbeldi gegn 71 árs strætisvagnastjóra í smábænum Tønder á Jótlandi, nálægt landamærum Þýskalands. Extra Bladet segir frá þessu og hefur eftir staðarmiðlinum. JydskeVestkysten.
Tveir mannanna eru 23 ára gamlir en sá eldri er 51 árs. Þeir eru allir Íslendingar, samkvæmt fréttinni, og hefur enginn þeirra fasta búsetu í Danmörku. Fyrir árásina á bílstjórann eru mennirnir sagðir hafa stolið áfengi úr matvöruverslun í bænum Højer og falið það undir fötum sínum. Þegar afgreiðslukona sakaði þá um þjófnað svöruðu þeir með dónaskap og létu sig hverfa á braut. Haft var samband við lögreglu og voru mennirnir því orðnir eftirlýstir er þeir réðust á vagnstjórann.
Árásin á vagnstjórann er sögð hafa verið hrottaleg, mennirnir börðu hann og spörkuðu í höfuð hans. Hann mun þó ekki vera alvarlega slasaður. Tilefni árásarinnar mun hafa verið það að vagnstjórinn vildi að mennirnir greiddu fargjald. Mennirnir voru farnir af vettvangi er lögregla kom en þeir voru allir handteknir skömmu síðar.
