Um klukkan 19 í gærkvöldi var tilkynnt um eld í fjölbýlishúsi við Fellsmúla í Reykjavík. Þar kom eldur upp í eldhúsi íbúðar á þriðju hæð. Slökkviliðið var með mikinn viðbúnað og réði fljótlega niðurlögum eldsins sem er sagður hafa komið upp í potti á eldavél.

Á ellefta tímanum í gærkvöldi var ekið á bifreið í Breiðholti og stakk tjónvaldur síðan af frá vettvangi. Vitni elti hann og skömmu síðar stöðvaði lögreglan hann. Hann er grunaður um að hafa verið undir áhrifum áfengis og fíkniefna og ítrekaðan akstur sviptur ökuréttindum.

Á öðrum tímanum í nótt var tilkynnt um innbrot og þjófnað í fyrirtæki í Hlíðahverfi. Í Mosfellsbæ var tilkynnt um innbrot í heimahús í gærkvöldi. Þaðan var verðmætum stolið.

Tveir ökumenn voru handteknir í gærkvöldi, grunaðir um að vera undir áhrifum áfengis og/eða fíkniefna. Annar þeirra reyndist einnig vera sviptur ökuréttindum.