Arturas Leimontas, karlmaður á sextugsaldri frá Litháen, hefur verið dæmdur fyrir að hafa myrt mann með því að kasta honum fram af svölum íbúðar í fjölbýlishúsi í Úlfarsárdal í fyrra. Fórnarlamb Arturasar var samlandi hans.

Fimm manns voru handteknir á vettvangi, en að endingu var Arturas einn úrskurðaður í gæsluvarðhald og ákærður.

DV sagði frá því í haust að ákæran í málinu hefði vakið mikinn óhug, en þar kom fram að Arturas hefði sparkað í fórnarlamb sitt, slegið hann í höfuðið með óþekktu áhaldi og látið hnefahöggin dynja á honum. Í kjölfarið kastaði Arturas manninum fram af svölunum á þriðju hæð þannig að hann féll um 7 metra niður og lenti á steyptri stétt.

Maðurinn lést skömmu síðar af áverkum sem hann hlaut á heila, brjóstkassa og brjóstholslíffærum.

Umsvifamikil rannsókn lögreglu á málinu vakti enn fremur athygli á sínum tíma, en lögreglan hafði þá fengið sér til aðstoðar verkfræðinga sem létu brúðu falla fram af svölunum til að líkja eftir falli mannsins. Brúðan líktist manninum að hæð og þyngd. Niðurstaða rannsóknarinnar var sú að manninum hafi verið ýtt eða kastað fram af svölunum af talsverðu afli.

Dómurinn féll í Héraðsdómi Reykjaness, en hann hefur enn ekki verið birtur í heild sinni á heimasíðu dómstólanna. Mál Arturas var eitt fjögurra morðmála sem komu upp árið 2020 þar sem samtals sex létust.