„Enn sem komið er eru engar vísbendingar um að orsaksamhengi sé milli andlátanna og bólusetninganna nema tímaraminn,“ sagði Rúna Hauksdóttir Hvannberg, forstjóri Lyfjastofnunar, í viðtali við Kastljós í kvöld. Tilkynnt hefur verið um fjögur andlát í kjölfar bólusetninga hérlendis fyrir COVID-19 með bóluefninu Pfizer.

Fjögur þúsund íbúar á hjúkrunarheimilum og um eitt þúsund heilbrigðisstarfsmenn voru bólusettir rétt fyrir áramót. Sóttvarnalæknir, landlæknir og Lyfjastofnun hafa ákveðið að láta framkvæma óháða rannsókn á dauðsföllunum. „Um andlát er að ræða, fjögur andlát og slíku fylgir alltaf sorg og missir. Samúð okkar er að sjálfsögðu með aðstandendum þessara einstaklinga og við funduðum í dag með sóttvarnalækni og landlækni og ákváðum í sameiningu að setja af stað rannsókn óháðra aðila um hvort orsakasamhengi sé á milli bólusetninganna og andláts þessara einstaklinga eða hvort orsakasamhengi sé milli undirliggjandi sjúkdóma hjá viðkomandi einstaklingum og andlátanna,“ sagði Rúna.

„Ég held að þetta sé mikilvægt skref að taka,“ sagði hún jafnframt en aðspurð staðfesti hún að 18 manns látist að jafnaði á hjúkrunarheimilum á landinu í hverri viku og tala látinni umrædda viku sé ekki hærri en vanalega. „Það voru bólusettir 4.000 einstaklingar af okkar elsta og kannski hrumasta fólki, margir eru þarna langveikir eða með undirliggjandi sjúkdóma. Því er kannski ekki óeðlilegt að þarna verði andlát og það sé tengt bólusetningunni í tíma.“

Rúna benti jafnframt á að á sama tíma hefðu verið bólusettir um 1.000 heilbrigðisstarfsmenn og hjá þeim hafi ekkert komið fram nema tilkynningar um minniháttar aukaverkanir á borð við flenskueinkenni, hita og slappleika.