Í kringum 4525 sýni voru tekin á veirufræðideild landspítalans í gær auk 640 landamæraskimanna. Karl Kristjánssonar yfirlæknir sýkla- og veirufræðideildar Landspítalans segist ekki geta gefið upp hver sé kostnaðurinn á bak við staka sýnatöku þar sem ekki hafi verið gefin út gjaldskrá yfir Covid-19 sýnatöku.
„Við megum ekki sem opinber stofnun verðleggja okkar eigin rannsóknir, það þarf samþykki fyrir því hjá Sjúkratryggingum Íslands,“ segir Karl en staðfestir að verðútreikningar séu í vinnslu.
Mótefnapróf á einkarannsóknastofum
Nærtækast er að reikna kostnað við sýnatöku út frá því að stakt sýni kosti 11.000 krónur en það er verðið sem innheimt er við landamæraskimun ef hún er ekki fyrir fram greidd. Þá kostar skimunin 9000 krónur. 4525 sýni myndu þá kosta heilbrigðiskerfið 49.775.000 krónur en landamæraskimanir eru þar fyrir utan þar sem þær eru greiddar af komufarþegum sjálfum.
„Við erum að fara yfir þetta mál varðandi gjaldskrá og sjá hvar það stendur. Ég get ekki sagt hvað skimun kostar fyrir en búið er að fara eftir ákveðnum ferlum. En með tilkomu nýrra aðstæðna, að það eru komnir einkaaðila sem vilja fá próf, þá þarf að gera gjaldskrá fyrir það,“ segir Karl.
„Það er byrjað að gera mótefnapróf á einkarannsóknarstofum og það skiptir sér engin af því það er að segja hvað það kostar.“ Er þá um útselda þjónustu óháð ríkinu að ræða en ekki er útilokað að hægt verði að kaupa sér skimun frá einkaaðilum áður en langt um líður.