Leikkonan Aldís Amah Hamilton fór hörðum orðum um helstu leikhús landsins í færslu sem hún birti á Facebook í gær. Aldís er ósátt með hversu einsleitir leikhóparnir eru í ár og benti á sérstaka kynningarmynd Þjóðleikhússins, þar sem má sjá stóran hóp leikara, ansi hvítan hóp.
Sjálf er Aldís af blönduðum uppruna, en hún ræddi þetta mál frekar við Önnu Marsibil Clausen í Lestinni á Rás 1. Þar var hún spurð hvort að þetta kæmi sér á óvart.
„Nei, það gerði það ekki. Ég þekki marga hverja af þessum leikurum sem eru af blönduðum uppruna og ég vissi að ekkert okkar var fastráðið þetta leikárið. En þessi mynd sem ég skrifa um í Facebook-færslunni minni. Hún kom kannski mest á óvart, en þar öskraði þetta í andlitið á manni í stað þess að skríða með fram veggjum.“
„Þetta eru allt ótrúlega hæfileikaríkir og flottir leikarar, en það er mjög mikil einsleitni í hópnum. Ég get ekki neitað því að það var svolítið sláandi, sérstaklega árið 2020,“
„Ég held að þetta sé ekki með ráðum gert, að það sé markvisst sleppa því að taka litaða leikara.“ Segir Aldís og segir að seinustu ár hafi þetta ekki verið svona, yfirleitt hafi verið allavega einn leikari af lituðum eða blönduðum uppruna. Hún tekur þó fram að í raun geti hún einungis talað fyrir sjálfa sig.
Hún segir að líklega liggi grunnur vandamálsins í því að enginn hafi hugsað út í þetta og vonandi séu þetta bara mistök.
Þá var Aldís spurð út í það hvers vegna hún hafi skrifað pistilinn hvort að hún gæti hafa verið að setja sig í sérstaka stöðu með sig eða mála sig út í horn.
„Afhverju gerir einhver sér það að vera leikari? Þú ert að gera sjálfa þig að auðveldu skotmarki. Fyrst ætlaði ég ekki að gera neitt. Ég vaknaði þennan morgun og var bent á þessa mynd og þá voru byrjaðar rosalegur umræður um þetta í lokuðum hópum. Og allt í einu fann ég bara sjálfa mig að skrifa einhverja rumsu í tölvunni. Ég bjóst ekkert endilega við því að fólk myndi nenna að lesa þetta en það gerði það.“
Aldís tekur þó fram að hún sé ekki að ráðast á einn né neinn. Hún viðurkennir einnig að svona pistlaskrif séu kvíðavaldandi og segist hafa sent skilaboðin „OMG ég held að ég hafi verið að eyðileggja ferilinn minn“ á vini sína efir að hún birti færsluna.
„Ég tók það fram í pistlinum að þetta er ekki árás, og þetta er ekki sett fram í einhverri illsku,“