Frá klukkan 17:00 í gærkvöldi og þar til klukkan 05:00 í nótt voru 85 mál skráð hjá Lögreglunni á höfuðborgarsvæðinu. Alls voru átta einstaklingar vistaðir í fangageymslu í nótt.
Laust barn
Lögreglan á höfuðborgarsvæðinu hafði afskipti af ökumanni í gærkvöldi vegna þess að barn var laust í bifreiðinni, þ.e. án öryggisbúnaðar. Við afskipti veitti lögreglan því eftirtekt að mikið magn af áfengi var í bílnum.
Ökumaðurinn, kona á fertugsaldri, viðurkenndi ólöglega sölu áfengis. Aðstandandi kom og tók við barninu og konunni var svo sleppt eftir skýrslutöku. Barnaverndarnefnd var gert viðvart.
Heimilisofbeldi og kannabis.
Tvær konur voru í nótt handteknar grunaðar um heimilisofbeldi. Vörðu þær báðar nóttinni í fangageymslu.
Í Grafarvogi var par handtekið vegna kannabisræktunar. Fundust hjá þeim þrjátíu plöntur og um tvö kíló af tilbúnum efnum. Parið viðurkenndi brotið og var sleppt að lokinni skýrslutöku.