„Mikil breyting hefur orðið á verslunar- og skrifstofustörfum undanfarin ár og stöndum við frammi fyrir fleiri áskorunum vegna þeirra tæknibreytinga sem orðið hafa á störfum og starfsumhverfi okkar fólks. Við höfum einnig fengið í hendurnar enn stærri áskoranir sem vert er að nefna á þessum hátíðardegi sem sanna og undirstrika mikilvægi verslunarstarfa á tímum Covid faraldursins. Það þarf vart að teikna upp þær sviðsmyndir sem hefðu getað skapast í okkar samfélagi ef ekki hefði notið við framlínufólks í verslun og þjónustu,“ ritar Ragnar Þór Ingólfsson, formaður VR í pistli sem birtist á vef stéttarfélagsins nú í dag, á frídegi verslunarmanna. Hann hvetur Íslendinga til að sýna verslunarfólki virðingu og stuðning í verki á þessum degi.
„Það er enginn vafi í mínum huga að framlínufólk okkar verslunarmanna er lífæð samfélagsins Þess vegna ber okkur að hrósa og þakka því fólki sérstaklega sem hefur staðið vaktina og lagt sig í aukna smithættu fyrir okkur öll til að tryggja aðgang að nauðsynjavörum og þjónustu á tímum Covid veirunnar,“ ritar Ragnar Þór meðal annars um leið og hann hvetur fólk hafa þetta í huga þegar fyrirtæki auglýsa sértilboð á þessum mikilvæga frídegi verslunarfólks.
„Réttast væri að við sýnum virðingu okkar í verki og reynum að sinna okkar verslun og viðskiptum á öðrum dögum en þessum.“
Ragnar Þór minnir um leið á það að frídagur verslunarmanna er er stórhátíðardagur skv. kjarasamningum VR.
„Á stórhátíðum er ekki vinnuskylda, nema um slíkt hafi verið samið sérstaklega milli launamanns og atvinnurekanda. Fyrir vinnu á frídegi verslunarmanna ber að greiða með stórhátíðarálagi, auk fastra og reglubundinna launa. Starfsmenn sem hefðu haft vinnuskyldu á þessum mánudegi, eiga rétt á að fá greidda dagvinnu fyrir þennan dag og á það jafnt við um starfsmenn á föstum mánaðarlaunum og starfsmenn sem fá greitt skv. tímakaupi.“