Fréttablaðið skýrir frá þessu í dag.
„Í rauninni hafa biðlistarnir lengst í sumar. Það hefur fjölgað á biðlistunum en það var alveg viðbúið.“
Er haft eftir Vigdísi Hallgrímsdóttur, forstöðumanni skurðstofu- og gjörgæslukjarna Landspítalans. Hún sagði einnig að flestir komist í aðgerð innan fimm mánaða.
Haft er eftir Margréti Guðjónsdóttur, forstöðumanni skurðlæknaþjónustu á spítalanum að augasteina- og liðskiptaaðgerðir séu stærstu biðflokkarnir.
„Biðtíminn eftir augasteinaaðgerðum náðist nú mjög vel niður á síðustu árum. Hann er enn þá innan ásættanlegra marka þó hann sé aðeins að færast upp á við.“
Landspítalinn hefur verið með átak í gangi til að stytta biðtíma eftir göngudeildarþjónustu en haft er eftir Margréti að sá biðtími sé dulin bið.
„Biðtíminn eftir því að komast í mat og endanlega ákvörðun um hvort þú þarft að fara í aðgerð hefur ekki alltaf verið skráður. Við höfum verið að vinna það niður og núna erum við komin í fjóra mánuði í bið en það voru átta mánuðir. Við það fjölgar á sjálfum biðlistanum en við erum að færa þetta í sýnilegra, eðlilegra og betra vinnufyrirkomulag.“
Átaksverkefni hefur verið í gangi í sumar til að grynnka á biðlistum og sagði Vigdís það hafa gengið ágætlega.
„Við höfum verið með átakshelgi í liðskiptaaðgerðum þar sem var gert töluvert af aðgerðum. Það er 12 prósenta samdráttur í öllum aðgerðum hjá okkur núna fyrstu sjö mánuði ársins. Í lok samkomubannsins var sá samdráttur 18 prósent.“
Sagði hún.
Margrét benti á að eðlilega hafi hlutirnir legið niðri að hluta yfir sumarið.
„Fólkið okkar þarf að komast í sumarfrí og svo hafa innköllunarstjórarnir okkar verið að hringja í sjúklinga og bjóða þeim aðgerðir og fólk kemst ekki. Fólk er í sumarfríi og það hefur áhrif. Það á helst við um liðskiptaaðgerðirnar þó það séu margir að bíða þá er fólk svo ekki alveg tilbúið að stökkva inn þegar það gefst færi.“
