Fréttablaðið skýrir frá þessu og hefur eftir Skarphéðni Berg Steinarssyni, ferðamálastjóra, að tryggja þurfi að rétt sé staðið að málum. Hann telur að hægt verði að opna fyrir umsóknir í sjóðinn um miðjan mánuð.
Samkvæmt nýsamþykktum lögum þá er Ferðamálastofu falið að reka Ferðaábyrgðasjóðinn og segir Skarphéðinn að þær séu nú þegar farnar að spyrjast fyrir um þennan nýja sjóð.
„En það á eftir að ganga frá reglugerð og tæknilegum atriðum. Við erum að vonast til þess að það klárist fyrir miðjan mánuðinn.“
Sagði hann og tók fram að gæta þurfi að ýmsum lögformlegum atriðum, til dæmis hvort lögin stangist á við ríkisstyrkjareglur EES-samningsins en hann telji að svo sé ekki.
„Það þarf að tryggja að það sé staðið rétt að þessu. Þarna er verið að lána fyrir tilteknum endurgreiðslum. Þeir eru til þess eins að endurgreiða og þarf að finna fyrirkomulag til að passa upp á það.“
Sagði Skarphéðinn sem sagðist telja að góð sátt ríki um að leysa málin með þessum hætti. Með þessu sé búið að tryggja fjármögnun til að ferðaskrifstofurnar geti endurgreitt. Hann sagði að lögin geti náð til fimmtán til tuttugu þúsund ferða en þau ná bæði yfir ferðir Íslendinga til útlanda og útlendinga hingað til lands. Erlendi hlutinn getur verið tæplega helmingur af heildarpakkanum að hans mati.