Áslaug Arna Sigurbjörnsdóttir dómsmálaráðherra hefur skipað Páleyju Borgþórsdóttir í embætti lögreglustjórans á Norðurlandi eystra frá og með 13. júlí næstkomandi. Páley var metin hæfust í starfið af hæfnisnefnd um embætti ríkislögreglustjóra. Fimm sóttu um stöðuna. Það voru þau Arnfríður Gígja Arngrímsdóttir, aðstoðarsaksóknari hjá embætti Héraðssaksóknara, Halldóra Kristín Hauksdóttir, lögmaður hjá Akureyrarbæ, Hreiðar Eiríksson, lögfræðingur hjá Fiskistofu, Sigurður Hólmar Kristjánsson, saksóknarfulltrúi og staðgengill lögreglustjóra á Norðurlandi vestra auk Páleyjar.
Halla Bergþóra Björnsdóttir gegndi áður starfi lögreglustjóra á Norðurlandi eystra þangað til hún sagði því lausu eftir skipan í starf lögreglustjóra á höfuðborgarsvæðinu og var þá starfið auglýst. Fjórir sóttu um það starf. Það voru þau Halla Bergþóra, Helgi Valberg Jensson, aðallögfræðingur lögreglunnar á höfuðborgarsvæðinu, Hulda Elsa Björgvinsdóttir, settur lögreglustjóri á höfuðborgarsvæðinu og Jón H. B. Snorrason, saksóknari við embætti ríkissaksóknara.
Embætti lögreglustjóra á höfuðborgarsvæðinu, sem Halla Bergþóra var nýlega skipuð í, losnaði þegar Sigríður Björk Guðjónsdóttir var skipuð í embætti ríkislögreglustjóra. Sjö sóttu um það starf. Það voru þau Arnar Ágústsson, öryggisvörður, Grímur Grímsson, tengslafulltrúi Íslands hjá Europol, Halla Bergþóra Björnsdóttir, lögreglustjóri á Norðurlandi Eystra, Kristín Jóhannesdóttir lögfræðingur, Logi Kjartansson lögfræðingur, Páll Winkel fangelsismálastjóri og loks Sigríður Björk.
Páley hefur frá árinu 2015 gegnt embætti lögreglustjóra í Vestmannaeyjum og má því reikna með að sú staða verði auglýst von bráðar.
Þannig hafa Sigríður Björk, Halla Bergþóra og nú Páley allar færst til í starfi, upp á við myndu flestir segja, við hvarf Haralds Johannessen úr starfi ríkislögreglustjóra. Það má því segja að fróðlegt verði að fylgjast með hvernig skipað verður í stöðu lögreglustjórans í Vestmannaeyjum og hvort lögreglustjórakapall Áslaugar Örnu haldi áfram.