Ungt par sem leigir herbergi í ólöglegu atvinnuhúsnæði að Dalvegi 26 í Kópavogi hefur árangurslaust reynt að ná sambandi við eigandann til að rifta leigusamningnum. Parið greiðir 130 þúsund krónur fyrir herbergið sem er um 10-15 fermetrar. Unga parið vill komast í annað húsnæði.
Þetta kom fram í kvöldfréttum Stöðvar 2.
Eigandinn er HD Verk ehf. en það er í eigu félagsins H20 ehf. Eigandi þess félags er Kristinn Jón Gíslason. Sömu eigendur eru að Bræðraborgarstíg 1 þar sem þrír létu lífið í húsbruna í síðasta mánuði.
Sami eigandi er einnig að Bræðraborgarstíg 3 en samtals á félagið fimm fasteignir í Reykjavík og Kópavogi. Um er að ræða atvinnuhúsnæði sem er ólöglegt sem íbúðarhúsnæði. Alls 134 eru skráðir með lögheimili í þessum húsum.
Rætt var við fulltrúa frá Eflingu í frétt Stöðvar 2 og lýsti hann yfir áhyggjum af því engir opnanlegir gluggar væru í húsinu.
Þá kom fram að í leigusamningnum er hvorki netfang né símanúmer.