Þórólfur Guðnason sóttvarnarlæknir brýnir fyrir almenningi að huga að smitvörnum. „Það er greinilegt að menn hafa slakað mjög, mjög mikið á. Það er ekki gott og er áhyggjuefni,“ sagði hann á blaðamannafundi almannavarna í dag. Almenningur þurfi að taka sig á í þessum efnum, annars sé hugsanlegt að þessi hraða aflétting á samkomubanni hér á landi komi í bakið á okkur.
Hópsýking kom upp um helgina og ljóst er að þau smit sem eru að dreifa sér hér á landi má rekja til ungrar knattspyrnukonu sem kom frá Bandaríkjunum og var talin ósmituð eftir skimun á Keflavíkurflugvelli greindist nokkru síðar með virkt smit.
Alma Möller landlæknir hvatti á fundinum til nærgætinnar umræðu um þá sem smitast og þá sem verða fyrir því að smita aðra.
Nafn ungu knattspyrnukonunnar var birt opinberlega ásamt mynd af henni þar sem greint var frá því að hún væri smituð. Vísaði Alma að öllum líkindum til þessa þegar hún sagði: „Nú liðna daga hafa einstaklingar verið nafngreindir. Fyrir utan að vera ótækt, vegna persónuverndarsjónarmiða, þá skapaði þetta aukið álag á smitrakningarteymið.“ Sagði hún umræðu um smitaða einstalinga ekki áður verið með þessu hætti og væri þetta á engan hátt við hæfi.
Þá sagði Þórólfur mikilvægt að taka fram að unga konan hafi farið eftir öllum reglum og því ekkert sem gefi tilefni til að ásaka hana um að bera ábyrgð á smitunum. Þrátt fyrir þessar hörðu ásakanir hafði konan einnig fundið fyrir miklum stuðning og vildi láta færa því fólki þakkir sínar.
Samkomutakmarkanir miðast nú við 500 manns, og næsta skref hefði verið að hækka þann fjölda upp í 2000 en einhver bið verður á því og ekki fyrirséð hvenær það verður í ljósi þeirra hópsýkingar sem komin er upp. Þá segist Þórólfur ekki geta mælt með því að skemmtistaðir séu með opið lengur og að áfram verði hér 2000 manna hámark á fjölda ferðamanna.
„Vonandi þurfum við ekki að herða samkomutakmarkanir og stíga skref til baka en það verður að koma í ljós. Það yrði áfall að þurfa að herða takmarkanir enn frekar eftir allar þær fórnir sem við höfum fært á undanförnum mánuðum,“ segir hann.
