Um klukkan 19 í gær var ráðist á mann í miðborginni. Hann var mjög bólginn í andliti og með brotna tönn að sögn lögreglunnar. Hann var mjög ölvaður og nánast ógerlegt að fá framburð frá honum varðandi málið. Hann var fluttur á slysadeild til aðhlynningar. Árásarmaðurinn var farinn af vettvangi. Málið er í rannsókn.
Á tólfta tímanum var kona slegin í andlitið við veitingahús í Hafnarfirði. Hún var flutt á slysadeild. Árásarmaðurinn var farinn af vettvangi þegar lögreglan kom á vettvang.
Á tólfta tímanum í gærkvöldi voru tveir menn handteknir í miðborginni grunaðir um eignaspjöll og fleira. Þeir voru vistaðir í fangageymslu.
Þrír ökumenn voru handteknir í gærkvöldi og nótt grunaðir um að vera undir áhrifum fíkniefna. Allir reyndust þeir vera sviptir ökuréttindum og var þetta ekki í fyrsta sinn sem þeir voru stöðvaðir við akstur þrátt fyrir það.
Einn ökumaður var sviptur ökuréttindum vegna of hraðs aksturs en bifreið hans mældist á 157 km/klst á Reykjanesbraut í Kópavogi í nótt. Leyfður hámarkshraði þar er 80 km/klst. Tveir aðrir ökumenn voru kærðir fyrir of hraðan akstur á sama vegarkafla.