Foreldrar barna í Hraunvallaskóla, Hafnarfirði, fengu tölvupóst frá skólastjóra skólans í dag þar var greint frá því að starfsmaður skólans hafi verið leystur frá störfum vegna lögreglumáls.
Fram kemur í póstinum að málið sé litið alvarlegum augum, en utanaðkomandi fagteymi og áfallahjálparteymi voru kölluð til. Málið á að hafa farið mjög fljótlega eftir meint atvik til rannsóknar hjá lögreglu, eða frá og með miðvikudeginum 20. maí, en þá var starfsmaðurinn leystur frá störfum.
Hér má sjá póstinn sem skólastjóri sendi í heilld sinni.
„Kæru foreldrar/forráðamenn
Í síðustu viku kom upp mál í Hraunvallaskóla sem snertir starfsmann skólans og er málið nú til rannsóknar hjá lögreglu. Þar sem málið er á rannsóknarstigi er ekki hægt að veita neinar upplýsingar að svo stöddu. Málið fór strax til rannsóknar hjá lögreglu og hefur verið til rannsóknar frá miðvikudeginum 20. maí. Sama dag var viðkomandi starfsmaður leystur frá störfum á meðan rannsókn stendur yfir, gagngert til að tryggja öryggi allra hlutaðeigandi og rannsóknarhagsmuni.
Málið er litið mjög alvarlegum augum og fór strax í viðeigandi farveg og ferli innan skólans og hjá skólayfirvöldum í Hafnarfirði þar sem unnið er samkvæmt fyrirfram skilgreindu verklagi í samstarfi við lögregluyfirvöld. Stjórnendateymi skólans var strax upplýst um aðstæður og eðli máls auk þess sem starfsfólk hefur verið upplýst um það að mál starfsmanns innan skólans sé til rannsóknar. Utanaðkomandi fagaðilar voru kallaðir til, starfsmannahópnum til stuðnings og ráðgjafar þannig að tryggja megi hagsmuni og öryggi heildarinnar. Áfallahjálparteymi skólans hefur verið virkjað auk foreldraráðs skólans með það fyrir augum að vel sé tekið utan um skólasamfélagið í heild sinni. Ekki er hægt að gefa upp ítarlegri upplýsingar eins og sakir standa til að tryggja megi trúnað og gæta persónuverndar hlutaðeigandi aðila.
Vinsamlega beinið öllum vangaveltum, fyrirspurnum og áhyggjuefni beint til mín.
Kær kveðja,
Lars Jóhann Imsland skólastjóri.“
Í morgun greindi DV frá því að maður sem væri grunaður um að áreita tvö börn kynferðislega gengi laus eftir að gæsluvarðhaldsúrskurður gegn honum var felldur úr gildi fyrir Landsrétti. Lögreglu hafði borist tilkynning um málið þann 19. maí og að um væri að ræða starfsmann skóla, án þess að farið væri nánar út í það. Ekki er hægt að segja til um hvort að málin tvö tengist, en tímasetningarnar sem vitnað er til í báðum málum gefa til kynna að mögulega sé um sama mál að ræða. Auk þess er um „starfmann“ að ræða í báðum atvikum.
Í gæsluvarðhaldsúrskurði Héraðsdóms Reykjaness frá 21. maí segir:
„Samkvæmt framburði annars barnsins hafi kærði fengið þau til að koma með sér á salerni og þar sýnt þeim ,„[…] sína“ sem bara strákar væru með og gæti orðið mjög hörð. Börnin hefðu síðan fengið að snerta ,,[…]“ og kyssa hana. Þá hafi börnin ekki mátt segja frá þessu því þá yrði kærði rauður og reiður.“
Lars Jóhann Imsland, skólastjóri Hraunvallaskóla, gat ekki tjáð sig um málið við DV, sömu sögu má segja um Árdísi Ármannsdóttur, sem sagði þó: „Um er að ræða mjög erfitt mál sem ég get bara ekki tjáð mig um,“ Árdís sagðist jafnframt ekki geta tjáð sig um hvort að málin tvö tengdust.
UPPFÆRT
Í kvöldfréttum Stöðvar 2 í kvöld var fjallað um málið, en þar er fullyrt að starfsmaðurinn sé á þrítugsaldri og hafi unnið á frístundarheimilinu Hraunseli. Hann hafi brotið gegn börnum sem voru sex og sjö ára, eða í fyrsta bekk. Starfsmaðurinn hafi verið á sínu fyrsta starfsári.
