Tómas Guðbjartsson, læknir, segir ríkið beita hjúkrunarfræðinga miklu ranglæti. Um gífurlega mikilvæga stétt sé að ræða, ekki síst á tímum sem þessum. Hjúkrunarfræðingar eru hetjur sem þurfi nú að sæta launaskerðingu og mæti engum samningsvilja hjá ríkinu í kjaraviðræðum.
Í gær ritaði hjúkrunarfræðingur á gjörgæsludeildinni í Fossvogi færslu á Facebook þar sem hún benti á að þrátt fyrir aukið álag í starfi á tímum COVID-19 þá hafi laun hennar lækkað um rúmar 40 þúsund krónur um mánaðamótin því sérstakur vaktaálagsauki hafi verið afnuminn. Tómas segir þetta kalda tusku í andlit hjúkrunarfræðinga á krítískum tímum.
„Hjúkrunarfræðingar eru tvímælalaust hetjurnar í Covid-19 faraldrinum – enda í langmestri snertingu við sjúklinga. Þá er ég ekki að gera lítið úr hlutverki félaga minna; gjörgæslu- og smitsjúkdómalækna eða lungna-, bráðamóttöku- og heimilislækna – sem allir skipa framvarðarsveitina. Síðan er fjöldi annarra stétta sem kemur líka við sögu. En aftur að hjúkrunarfræðingum – hetjunum sem enn eru samningslausar eftir árs samningaviðræður. „
Ekki sé á samningsleysið bætandi að laun hjúkrunarfræðinga hafi verið skert rétt áður en Covid faraldurinn skall á og auk þess sé það ekki í samræmi við fögur loforð Vinstri Grænna þegar þeir gengu inn í ríkisstjórnarsamstarf.
„Og það til að ná auknum sparnaði á LSH. Þetta gerist á vakt VG sem reifir sögðust ætla að styðja sérstaklega við kvennastéttir í þessari ríkisstjórn. Það er eitthvað mikið rangt við þetta allt saman – ekki síst núna þegar þessi hámenntaða stétt – sem bókstaflega hættir lífi sínu til að bjarga öðrum – skuli endurtekið fá svona kaldar tuskur í andlitið. Erlendis er verið að borga hjúkrunarfræðingum ríflega bónusa – enda verður þessi faraldur ekki unninn án þeirra.
Tómas skorar því á ríkið að gera það rétta og ganga til samninga við hjúkrunarfræðinga. Þeir eigi það skilið að vera metnir að verðleikum.
„Koma svo- og ekki segja mér að ómögulegt sé að semja vegna launaskriðs á almennum vinnumarkaði. Þetta er gömul lumma og þreytt. Allir sjá núna – og hefðu betur séð fyrr- hversu mikilvægt hlutverk þeirra er. Samfélög fungera ekki án heilbrigðiskerfis og þar eru hjúkrunarfræðingar risastórt og ómissandi tannhjól.“