Líkt og DV greindi frá í dag þá var Kona úr bakvarðarsveit heilbrigðisstofnunar Vestfjarða handtekin handtekin, grunuð um að hafa falsað skjöl um menntun og starfsleyfi sín sem sjúkraliði. Henni hefur nú verið sleppt. Það kom fram í Facebook-færslu frá lögreglunni á Vestfjörðum.

Konan er einnig grunuð um að hafa stolið eða reynt að stela lyfjum. Hún hafði starfað á hjúkrunarheimilinu Bergi, Bolungarvík í seinustu viku, og var utanbæjarmanneskja.

Í færslu lögreglu segir: 

„Kl.11:12 í morgun (10.04.2020) barst lögreglunni á Vestfjörðum kæra fá forstöðumanni Heilbrigðisstofnunar Vestfjarða gagnvart einum bakvarða heilbrigðisþjónustu sem svaraði hjálparbeiðni heilbrigðisstofnunarinnar vegna veirusýkingar og manneklu á dvalarheimilinu Bergi í Bolungarvík. Bakverðirnir voru fluttir frá Reykjavík til Ísafjarðar þann 6. apríl sl.

Í kærunni var þessi starfsmaður borinn þeim sökum að hafa lagt fram fölsuð gögn er varða starfsréttindi sem heilbrigðisstarfsmaður. Á þeim forsendum hafði starfsmanninum verið falin ábyrgð á dvalarheimilinu Bergi. Þá lék grunur um að starfsmaðurinn hafi misfarið með lyf í dvalarheimilinu, þ.e.a.s. tekið lyf ófrjálsri hendi.“

Fram kemur í færslunni að konan hafi verið yfirheyrð og sleppt í kjölfarið. Þá segir einnig að lögregla muni ekki tjá sig meira um málið að svo stöddu.

„Í framhaldi þessa fóru lögreglumenn á dvalarstað starfsmannsins og var hann handtekinn og færður til yfirheyrslu. Þá var framkvæmd húsleit á dvalarstaðnum.

Yfirheyrslan hefur farið fram og hefur starfsmanninum verið sleppt enda ekki fyrir hendi ástæða til að halda honum lengur. Rannsókn málsins stendur enn yfir og ekki tímabært að veita frekari upplýsingar.“