Korungir drengir, 12-13 ára, eru sakaðir um að hafa verið með afar ógeðfelld dólgslæti í Krónunni á Granda í gær, að virðist til að hæðast að ótta fólks við COVID-19 veiruna og svívirða þær umgengnisreglur sem settar hafa verið í almannarými vegna veirunnar.
Fréttablaðið greinir frá þessu en drengirnir eru sagðir hafa hóstað að fólki, borað í nef sér og einn stakk upp í sig putta og strauk honum síðan eftir vörum í hillu.
Drengirnir eru sagðir hafa svarað tilmælum um að láta af þessari hegðun með hortugheitum.
„Sá stærsti í hópnum gekk aftan að fólki, stoppaði eins nálægt því og hann komst og púaði svo eða hóstaði á það. Á meðan tók annar allt saman upp á síma,“ segir kona sem var á staðnum við innkaup í samtali við Fréttablaðið.
Samkvæmt fréttinni var málið tilkynnt til lögreglu en framferði drengjanna náðist á upptökur eftirlitsmyndavéla í versluninni.