Nú er verið að undirbúa að leggja stærstum hluta flugflota Icelandair en vegna ráðstafana vegna COVID-19 liggur nær allt flug til og frá landinu niðri. Umfang starfsemi félagsins er nú aðeins um 14% af því sem gert var ráð fyrir í áætlunum þess. 240 starfsmönnum var sagt upp störfum í gær og hlutfall launa annarra lækkað sem og starfshlutfall.
Morgunblaðið skýrir frá þessu í dag. Fram kemur að ferðaþjónustan í landinu sé nær stopp og farið er að þrengja að sjávarútveginum.
„Mér heyrist á mönnum í kringum mig að það sé óhjákvæmilegt að draga saman seglin.“
Hefur Morgunblaðið eftir Sigurgeiri Brynjari Kristgeirssyni, framkvæmdastjóra Vinnslustöðvarinnar í Vestmannaeyjum. Þar fer nú mikið af fiski í söltun því saltfiskur hefur mikið geymsluþol.
Samtök fjármálafyrirtækja og Landssamband lífeyrissjóði kynntu í gær samkomulag um tímabundinn greiðslufrest á lánum fyrirtækja. Þau geta sótt um allt að sex mánaða greiðslufresti hjá aðalviðskiptabönkum sínum. Markmiðið er að aðstoða fyrirtækin við að komast hratt og örugglega í skjól með einföldum hætti.
Vel er fylgst með hvort nægar birgðir eru af helstu nauðsynjum í landinu, það er mat, lyfjum og eldsneyti. Staðan er sögð vera góð að því er segir í frétt Morgunblaðsins.