Lagt er til að stjórn eignarhaldsfélagsins Glitnis HoldCo haldi óbreyttum launum frá síðasta ári. Þetta þýðir að Mike Wheeler, stjórnarformaður félagsins, mun fá sem nemur 4,2 milljónum króna fyrir störf sín á þessu ári.
Ekki er um fullt starf að ræða því hann fær þessa upphæð, 4,2 milljónir, fyrir störf sín „að því tilskildu að þau útheimti að hámarki fimm heila vinnudaga“ eins og það er orðað í frétt Markaðarins sem greinir frá málinu í dag.
Ef miðað er við 8 stunda vinnudag í fimm daga þýðir þetta að tímakaupið er 105 þúsund krónur.
Glitnir HoldCo var stofnað eftir að slitabú Glitnis lauk nauðasamningum og sér meðal annars um að selja eignir slitabús Glitnis fyrir erlenda vogunarsjóði. Aðrir stjórnarmenn munu einnig fá ágætis laun, samkvæmt frétt Markaðarins. Tom Gröndahl og Steen Parsholt fá 2,8 milljónir króna fyrir að hámarki fjóra vinnudaga.
Og ef svo fer að starfið útheimti meiri vinnu fær hver stjórnarmaður sem nemur 690 þúsund krónum fyrir hvern unnin dag.