Handknattleiksdeild ÍBV í Vestmannaeyjum hefur farið fram á viðbrögð frá HSÍ vegna ummæla sem íþróttafréttamaðurinn Guðjón Guðmundsson, Gaupi, lét falla í beinni útsendingu á Stöð 2 Sport á mánudagskvöld. Þetta kemur fram á vef Eyjafrétta.
Guðjón var að lýsa leik Selfoss og Aftureldingar ásamt Guðlaugi Arnarsyni þegar talið barst að svokölluðu júggabragði. Um er að ræða alræmt og stórhættulegt leikbrot þegar varnarmaður grípur í fót hornamanns sem er að koma inn úr horninu.
Afleiðingarnar geta verið hættulegar og enda oftar en ekki með því að sóknarmaðurinn missir jafnvægið í loftinu. Eins og bent er á í frétt Eyjafrétta þarf oft ekki mikla snertingu til þegar menn eru í loftinu og á talsverðri ferð. Myndband af dæmigerðu júggabragði, eins og það er kallað, má sjá hér neðst í fréttinni:
Guðjón sagði í útsendingunni orðrétt: „Eyjamenn eru klókir í þessu. Þeir gera þetta mikið, takið eftir.“
Eyjamenn eru verulega óhressir með þessi ummæli og lýsti Kristinn Guðmundsson, annar þjálfara ÍBV, vonbrigðum og hneykslun með ummælin í samtali við Eyjafréttir. „Að halda því fram að leikmenn ÍBV taki kerfisbundið þátt í að framkalla eitt alvarlegasta brot handboltasögunnar, og það reglulega, eru stórar ásakanir! Ásakanir sem ég bíð eftir að Guðjón sanni með myndböndum, sem hann hlýtur að hafa afar gott aðgengi að.“
Kristinn bætti við að þessi ummæli dæmi sig sjálf en þau væru samt þess eðlis að rýrð væri kastað á ÍBV auk þess sem vegið væri að starfsheiðri þjálfara og persónum leikmanna.
„Við höfum farið fram á viðbrögð af hálfu HSÍ og mér þætti eðlilegt að Guðjón bæðist afsökunar á þessum ummælum á sama vettvangi og þau voru látin falla,“ segir hann.
Eyjafréttir ræddu einnig við Gaupa sem sagði að þetta hefði verið sagt í hita leiksins. Hann sagðist þó ekki vilja nefna nein ákveðin atvik þar sem leikmenn ÍBV hafa beitt bragðinu. Hann sagðist þó hafa aðgang að öllum leikjum deildarinnar síðustu ár og gögnin tali sínu máli.
Júggabragðið á EM. Þó sáu dómararnir ekki ástæðu til þess einu sinni að spjalda Boka 👌 #emruv pic.twitter.com/MCi0XpfB4h
— Gunnar Birgisson (@grjotze) January 17, 2020