Lögreglan á Suðurnesjum stöðvaði ökumann sem mældist á 138 kílómetra hraða á Reykjanesbraut í fyrradag. Ekki nóg með að maðurinn æki bifreið sinni allt of hratt heldur var hann einnig greinilega mjög ölvaður þegar lögregla stöðvaði för hans.
Að sögn lögreglu var maðurinn handtekinn og færður á lögreglustöð.
Þá hafa nokkrir ökumenn til viðbótar verið kærðir fyrir of hraðan akstur á síðustu dögum. Sá sem hraðast ók mældist á 153 kílómetra hraða á Reykjanesbraut þar sem hámarkshraði er 90 kílómetrar á klukkustund. Hans bíður 210 þúsunda króna sekt og svipting ökuréttinda í einn mánuð.