„Nú skoðum við framhaldið og tilkynnum hvað við getum boðið upp á þegar reglugerðin kemur út. Verið a.m.k tilbúin að mæta á æfingu,“ segir í tilkynningu frá líkamsræktarstöðinni Crossfit Reykjavík, sem er til húsa í Faxafeni.

Næstkomandi fimmtudag tekur gildi ný reglugerð um samkomutakmarkanir. Um er að ræða einhverjar tilslakanir en þær fela almennt ekki í sér opnun líkamsræktarstöðva. Reglugerðin gildir til 12. janúar.

Ein tilslökun gæti hugsanlega nýst líkamsræktarstöðvum: „Öllum er heimilt að stunda skipulagðar æfingar utandyra sem krefjast ekki snertingar.“

DV hafði samband við Hrönn Sveinsdóttur, framkvæmdastjóra Crossfit Reykjavík. Hún segir málið fyrst og fremst til skoðunar: „Við erum bara að skoða hvaða möguleika við höfum og munum gera það sem möguleikarnir leyfa okkur. Við klárlega megum vera úti. Þetta er bara svo nýkomið og ég er að skoða þetta frá öllum hliðum. Við munum nýta alla okkar möguleika, það er best að orða það þannig og það er engu við það að bæta á þessum tímapunkti,“ segir Hrönn en í fljótu bragði er ekki annað að sjá en einu möguleikarnir fyrir líkamsræktarstöðvarnar séu að bjóða viðskiptavinum sínum upp á útiæfingar. Vonandi viðrar til þess á næstunni.