Landsréttur snéri í vikunni við úrskurð héraðsdóms og staðfesti ákvörðun barnaverndaryfirvalda um að taka ætti tvo drengi af heimili foreldra þeirra vegna „daglegrar áfengisneyslu“ og ofbeldis.
Málið teygir sig raunar mörg ár aftur í tímann, en í dóminum kemur fram að frá því í júlí árið 2017 hafa 17 tilkynningar borist yfirvöldum vegna áfengisneyslu foreldra, vanrækslu þeirra á drengjunum og heimilisofbeldis. Afskipti yfirvalda hófust af fólkin hófust raunar áður en drengirnir fæddust. Þá kemur fram í greinargerð yfirvalda að mörg úrræði séu nú fullreynd, þar á meðal eftirlit, inngrip og meðferðaráætlanir. Staða drengjanna hafi svo sífellt orðið alvarlegri eftir því sem lengra leið.
Í greinargerð yfirvalda kom jafnframt fram að drengirnir hafi sagt frá því í skólanum að faðir þeirra hafi gripið um háls annars þeirra og sparkað í rass hans. Sagði drengurinn að hann hafi átt það skilið, enda verið „óþekkur.“ Enn fremur segir að faðir drengjanna hafi hótað barnaverndarfulltrúum á símafundi vegna málsins.
Þá segir í úrskurði Landsréttar að leitað hafi verið til barnaverndaryfirvalda þegar eldri drengurinn leitaði til nágranna sinna og tilkynnt þeim að pabbi sinn væri að drepa mömmu sína. Þegar yfirvöld komu á staðinn blasti við þeim „augljóslega drukkin“ móðir, blóðugur koddi eftir áverka hennar og faðir í miklu uppnámi. Mun hann hafa hótað að fyrirfara sér ef drengirnir yrðu teknir af þeim. Drengirnir voru neyðarvistaðir í kjölfarið.
Sem fyrr segir hefur úrskurður félagsmálayfirvalda nú verið staðfestur og verða börnin því vistuð utan heimilis foreldra þeirra í tvo mánuði frá 9. október.