Ekki er vitað hvenær bóluefni gegn COVID-19 kemur til Íslands, það gæti orðið þegar í janúar en líka nokkru síðar. Þetta kemur fram í fréttaskýringaþættinum Speglinum á RÚV. Þórólfur Guðnason sóttvarnalæknir segir þar útilokað að segja til um hvenær bóluefnið berist.

Fram kemur í umfjölluninni að gert sé ráð fyrir að hver einstaklingur þurfi tvær sprautur til öryggis. Því verði keyptur tvöfaldur fjöldi skammta miðað við þann fjölda sem áætlað er að verði bólusettur. Gert er ráð fyrir að bólusetja um 270 til 300 þúsund manns og verður lítil áhersla lögð á börn. „Þá er ekki gert ráð fyrir því að börn verði ofarlega á lista í bólusetningunni nema að þau hafi einhvern undirliggjandi áhættuþátt. Þetta er öðru vísi en þetta var í svínaflensunni og inflúensu þar sem börn eru oft aðal smitberar veikinnar. Þannig að við erum ekki að leggja áherslu á að börn verði bólusett núna,“ segir Þórólfur í samtali við Spegilinn.

Unnið er að forgangslista um hverjir verða fyrstir til að fá bóluefni. Þórólfur segir að í þeirri vinnu sé stuðst við tillögur frá Alþjóða heilbrigðismálastofnuninni. Segir hann að bólusetningin þurfi ekki að taka langan tíma en það fari eftir því hve mikið og hratt bóluefni berist til landsins.