Landsréttur felldi á föstudaginn úr gildi úrskurð Héraðsdóms Reykjaness sem hafði vísað frá barnfaðernismáli.
Kona gerði þá kröfu fyrir hönd sonar síns að viðurkennt yrði að maður sem býr í Bandaríkjunum væri faðir drengsins og að maðurinn myndi greiða meðlag með drengnum frá fæðingu hans til 18 ára aldurs. Konan segir að hún hafi átt í nánum kynnum við manninn á getnaðartíma barnsins.
Konan gerir þá kröfu að gerð verði mannerfðafræðileg rannsókn á manninum, henni og syninum, til að leiða faðernið í ljós. Hinn meinti faðir hefur ekki látið sig málið varða.
Héraðsdómur Reykjaness taldi að ekki væri hægt að koma við mannerfðafræðilegri rannsókn á fólkinu og því verði að styðjast við önnur gögn. Konan lagði fram samskipti aðila á samfélagsmiðlum en héraðsdómur taldi þau ekki vera afgerandi. Í þeim samskiptum sagðist maðurinn ekki trúa því að hann væri faðir drengsins.
Héraðsdómur taldi óhjákvæmilegt að vísa málinu frá þar sem ekki væru til staðar gögn sem sanni faðernið.
Þessu var Landsréttur ekki sammála og vísaði málinu aftur í hérað til frekari meðferðar, meðal annars á þeim forsendum að móðirin hafi ekki fallið frá þeirri kröfu sinni að mannerfðafræðileg rannsókn fari fram. Héraðsdómi beri að leysa úr kröfu hennar.
