35 ára gömul kona var skömmu fyrir helgi dæmd í sex mánaða fangelsi fyrir langa runu afbrota. Dómurinn var kveðinn upp í Héraðsdómi Reykjavíkur.
Konan er meðal annars sakfelld fyrir 33 fjársvik, þarf af 32 framin í aprílmánuði 2019. Allt eru þetta minniháttar fjársvik, en hún stal greiðslukorti og framdi fjölmargar úttektir með því. Meðal annars stal konan af Jóa Fel, Rúmfatalagernum og Lyfju. Samtals nema fjársvikin aðeins rúmlega 300 þúsund krónum. Konan framdi 13 afbrot á einum og sama deginum, 20. apríl 2019, þar sem hún stal meðal annars af Nova, 10-11 og Hreyfli.
Konan var einnig sakfelld fyrir vörslu fíkniefna og fyrir að hafa hníf í vörslu sinni.
Konan var einnig sakfelld fyrir hylmingu, en hún tók við Canyon Spectral fjallahjóli úr hendi óþekkts aðila þrátt fyrir að vita að um þýfi væri að ræða.
Einnig var hún sakfelld fyrir að stela vörum úr Nettó Mjódd að verðmæti um 6.500 krónur.
Konan á brotaferil að baki en dómsáttir voru gerðar í fyrri málum hennar. Hún játaði brot sín og fékk sex mánaða fangelsisdóm.
