Vorið 2019 voru tvær konur sakfelldar við Héraðsdóm Norðurlands eystra fyrir að hafa tekið 8 ára dreng með valdi upp í bíl til sín og ekið honum heim til móður sinnar. Voru konurnar sakaðar um að hafa sýnt barninu ruddalega og vanvirðandi framkomu og þar með brotið gegn barnaverndarlögum.
Til átaka hafði komið á fótboltavelli og sakaði konan sem átti frumkvæðið að brottnámi drengsins hann um að hafa lagt dóttur sína í einelti.
Drengnum og konunum bar ekki saman um atvikið og lýstu þær hegðun sinni sem miklu hófstilltari en drengurinn sem sagði að þær hafi verið reiðilegar og dregið hann inn í bíl. Framburður eldri barna sem urðu vitni að atvikinu var konunum í óhag. Drengurinn hringdi í neyðarlínu og af því samtali þótti sannað að önnur konan hefði öskrað á hann.
Konan sem hafði frumkvæði í málinu hafði árið 2010 verið dæmd í tveggja ára skilorðsbundið fangelsi fyrir ofbeldi gegn opinberum starfsmanni. Konan sem sökuð var um hlutdeild í málinu og var með henni í bílnum hafði verið sakfelld fyrir þjófnað árið 2007 og umferðarlagabrot árið 2017.
Niðurstaða héraðsdóms í fyrra var að önnur konan, sú sem harðar gekk fram og hafði frumkvæði að ofbeldinu gegn drengnum, var dæmd í þriggja mánaða skilorðsbundið fangelsi en hin konan fékk 30 daga skilrorðsbundið fangelsi. Fyrrnefnda konan var dæmd til að greiða drengnum 600 þúsund krónur í skaðabætur og hin konan 100 þúsund krónur.
Konurnar áfrýjuðu til Landsréttar sem komst að þeirri niðurstöðu í dag, föstudaginn 30. október, að dómur héraðsdóms skyldi standa óraskaður.