Enginn verður lagður inn á Vog næstu daga vegna Covid smits sem kom upp þar í síðustu viku. Þetta kemur fram í tilkynningu Einars Hermannssonar, formanns SÁÁ.
Segir Einar að fyrsta tilfelli Covid smits á Vogi hafi greinst þann 24. október síðastliðinn. Í kjölfar smitsins hafi viðkomandi farið í einangrun og 17 aðrir í sóttkví. Skömmu seinna greindist einn starfsmaður með Covid sem varð til þess að einn til þurfti að fara í sóttkví. Tveir eru því í einangrun með virkt Covid-19 smit og 18 í sóttkví.
Innlögnum var frestað strax 25. október og verða ekki hafnar að nýju fyrr en 29. október hið fyrsta, að því er fram kemur í tilkynningu SÁÁ. Munu allir starfsmenn á Vogi og á meðferðarheimilinu Vík auk allra inniliggjandi sjúklinga á Vogi fara í sýnatöku í dag og á morgun sem skera mun úr hvort hægt verði að leggja fleiri inn 29. október.
Þá segir í tilkynningunni: „Við hörmum að þurfa að fresta innlögnum en efst í huga okkar núna er að tryggja velferð sjúklinga og starfsmanna, og draga úr líkum á Covid-19 smiti eins og frekast er unnt.“