Arnar Hilmarsson, háseti á Frystitogaranum Júlíusi Geirmundssyni opnaði sig um upplifunina á togaranum þar sem að næstum því allir smituðust af COVID-19 og voru látnir vinna veikir. Arnar var í viðtali í Fréttum RÚV.
Fram kemur að þriggja daga einangrun var í boði fyrir þá fyrstu sem veiktust um borð. Þremur vikum síðar var fyrst farið í sýnatöku.
Í viðtalinu var Arnar spurður hvort að hann hafi verið mikið veikur, og hann svaraði játandi.
„Já ég fann fyrir svima, hausverk, hálsbólgu og hósta.“
Hann lýsir því einnig hversu erfitt það hafi verið að horfa á þann sem var hvað mest veikur. Að sögn Arnars vann hann þrjár vaktir og er einn „harðasti“ maður sem hann þekkir.
„Sá sem var hvað veikastur, er einn harðasti maður sem ég þekki. Hann lét sig hafa það í einhverjar þrjár vaktir að vinna veikur, svo var hann orðinn svo slæmur að hann gat það hreinlega ekki. Það var erfitt að horfa á hann færa sig af bekknum upp í sjúkraklefa.“
„Nei, það er alls ekki eðlilegt.“ sagði Arnar um ástandið og viðbrögð skipstjóra. Hann segir að andmæli gegn skipstjóra séu hreinlega ekki í boði.
„Andmæli beinlínis gegn skipstjórunum á frystitogara líðst ekki.“
Í frásögn Arnars kemur einnig fram hvernig hefði verið brugðist við þegar að í ljós kom að smit væri um borð. Þá hafi skipverjum verið sagt að klára aflann og hefja lokaþrif á skipinu. Í þessum þrifum felist háþrýstiþvottur sem hafi haft þau áhrif að einn skipverjanna hafi þurft frá að hverfa, vegna þess að hann fékk svo mikil gufu í lungun.
„Það alvarlegasta var að halda mönnum nauðugum við vinnu á meðan þeir voru veikir.“ sagði Arnar jafnframt í viðtalinu
Að lokum sagði hann að viðbrögð Hraðfrystihússins Gunnvarar við „skandalnum“ hafi ekki komið sér á óvart og þá var hann spurður hvort að hann væri hræddur um að missa vinnuna vegna viðtalsins, Þá sagði hann að tjáning sín væri mikilvægari en starfið.
„Hegðun HG í þessum kórónuvírusskandal núna er í nákvæmu samræmi við hegðun fyrirtækisins gagnvart starfsmönnum hvað varðar öryggi og heilsu starfsmanna í fortíðinni.“
„Tjáning mín á málinu er óendanlega verðmætari en starf mitt þarna um borð.“