Þau hjónin hafa síðan árið 1989 staðið að útflutningi hesta og stofnuðu utan um þann rekstur fyrirtæki árið 2003. Sjá þau nú um að kaupa hesta innanlands til útflutnings, sem og að rækta þá til útflutnings auk þess að flytja út hross sem aðrir hafa selt. Árið 2019 flutti fyrirtækið út 653 hesta og stefnir í að sú tala hækki enn árið 2020 og því ekki að sjá að COVID sé að hafa neikvæð áhrif á þau millilandsviðskipti eins og svo mörg önnur. Hjá fyrirtækinu starfa börn þeirra Huldu og Hinriks og tengdadóttir. „COVID er ekki að setja strik í reikninginn hjá okkur. Það mætti meira að segja segja að
COVID sé að hafa þveröfug áhrif á útflutninginn og sala hesta bara nokkuð góð núna á þessu ári,“ sagði Hulda í samtali við blaðamann DV. Sagði hún að hugsanleg skýring á því væri að fólk hefði ef til vill meira milli handanna enda væri peningum ekki eytt í ferðalög á meðan.
Á hljóðinu í Huldu að dæma er ljóst að hún nýtur sín vel í þessum bransa og er stolt af því sem hún er að selja: „Íslenski hesturinn er fyrir löngu búinn að vinna sér inn sérstöðu og er mjög vinsæll til dæmis í Þýskalandi. Hestarnir okkar eru einstakir, gangtegundirnar, töltið og skeiðið og karakterinn þeirra, þeir eru svo ljúfir og góðir,“ útskýrir hún.
Að flytja út hest fylgir mikið tilstand, enda um 350 kílóa lifandi veru að ræða. Fyrst þarf að sækja hestinn og koma honum til dýralæknis sem fyllir út nauðsynlega pappíra sem fylgja hestinum út, svokallað vegabréf, auk þess sem dýralæknirinn vottar að hesturinn sé heilbrigður og hafi heilsu í ferðalagið. Að því loknu fer hesturinn til Keflavíkur, en þeir eru allir fluttir utan með flugi. Hestunum er í Keflavík komið fyrir í sérstökum fluggámum sem rúmast í Boeing 757 fraktflutningavélar Icelandair. Þar hitta hestarnir jafnframt umsjónarmann hestaflutninga hjá Icelandair sem flýgur með hestunum út.
Fullhlaðinn rúmar Icelandair þota heila 60 hesta, og reiknast Huldu þannig til að um sé að ræða 167 fullar fraktflutningavélar Icelandair sem Hestvit hefur flutt út í gegnum árin. Hestarnir sem Hestvit selur til útlanda eru, að sögn Huldu, á breiðu verðbili. „Þeir byrja í svona fjögur til fimm hundruð þúsundum en geta farið í margar milljónir. Þar vegur auðvitað þyngst gæði hestsins, það er að segja gangtegundirnar, hvað hann lyftir fótunum hátt til dæmis, eða hvort hann henti í keppni eða bara sem reiðhestur,“ útskýrir hún.
Aðspurð hverjir það eru sem kaupi sér íslenska hesta segir Hulda það vera „alls konar fólk“ og tekur fyrir það að þetta sé yfirstéttarsport. „Nei, þetta er ekki ódýrt sport, vissulega, en þetta er ekki það dýrasta heldur, hvorki hérna heima né í Evrópu.“ Hér heima leggja um 20-30 þúsund manns stund á íþróttina. „Við erum þriðja stærsta sportið í ÍSÍ á eftir fótboltanum og golfinu,“ segir Hulda.
