Á sjötta tímanum í gær var lögreglunni tilkynnt um rán í veitingasölu í miðborginni. Þar náði ræninginn að hafa reiðufé á brott með sér. Hann var handtekinn úti á Granda um tuttugu mínútum eftir að tilkynningin barst. Maðurinn var vistaður í fangageymslu en lögreglan hefur þurft að hafa ítrekuð afskipti af honum á undanförnum dögum vegna svona mála.

Á sjötta tímanum í gær slasaðist brimbrettamaður þegar hann var að leik í sjónum við Gróttu. Hann var á brimbretti og með fallhlíf þegar hann tókst á loft og lenti á grjóthleðslu í fjörunni. Hann er hugsanlega ökklabrotinn og var fluttur með sjúkrabifreið á slysadeild.

Á tíunda tímanum í gærkvöldi réðust tveir piltar, 16 og 17 ára, á þann þriðja, 16 ára. Flytja þurfti fórnarlambið á slysadeild til aðhlynningar en hann var með brotna tönn. Málið er í rannsókn.

Á tíunda tímanum í gærkvöldi var kona handtekin í verslun úti á Granda en hún er grunuð um þjófnað. Hún var ekki með nein skilríki meðferðis og sagðist vera erlendur ferðamaður. Hún var vistuð í fangageymslu vegna rannsóknar málsins.

Tveir ökumenn voru handteknir í gærkvöldi og nótt, grunaðir um að vera undir áhrifum fíkniefna.

Þrír ökumenn voru kærðir fyrir of hraðan akstur. Einn mældist á 142 km/klst á Suðurlandsvegi við Sandskeið en þar er leyfðu hámarkshraði 90 km/klst. Annar á 113 km/klst á Reykjanesbraut í Kópavogi en þar er leyfður hámarkshraði 80 km/klst. Sá þriðji, sem er aðeins 17 ára, mældist á 117 km/klst á Reykjanesbraut í Kópavogi þar sem leyfðu hámarkshraði er 80 km/klst.